Është e shtunë mbrëma. Stufa e banjës ka një bark të përflakur. Dritarja e ajrimit është e puthitur fort. Javën e shkuar Arni i vogël dyvjeçar u sëmur me rrufë nga ajri i ftohtë që hynte brenda. Mamaja fërkon shpinën e Arnit të vogël me një palë të mbathura të dala boje. I vogli pllaquritet. Mamaja ngre vogëlushin nga vaska. Fëmija i shkretë, thotë gjyshi. Fëmijët nuk duhen larë kaq të vegjël, thotë gjyshja. Mamaja rrëshqet në vaskë. Uji është ende i nxehtë. Sapuni shkumon. Mamaja fërkon pisllëkun nga qafa. Yndyra noton në sipërfaqen e ujit. Vaska mbështillet me një bordurë të verdhë. Mamaja del nga vaska. Uji ende është i nxehtë, i thotë ajo babait. Në vaskë hidhet babai. Uji është i ngrohtë. Sapuni shkumon. Babai fërkon pisllëkun nga gjoksi. Lëtyrat e babait notojnë në sipërfaqen e ujit bashkë me ato të mamasë. Bordura e vaskës bëhet kafe. Babai del nga vaska. Uji ende është i ngrohtë, i thërret ai gjyshes. Gjyshja hidhet në vaskë. Uji është i vakët. Sapuni shkumon. Gjyshja fërkon pisllëkun nga supet. Letyrat e gjyshes notojnë bashkë me ato të babait dhe të mamasë në sipërfaqen e ujit. Bordura e vaskës bëhet e zezë. Gjyshja del nga vaska. Uji është ende i ngrohtë, i thërret ajo gjyshit. Gjyshi hidhet në vaskë. Uji është akull i ftohtë. Sapuni shkumon. Gjyshi fërkon pisllëkun nga bërrylat. Lëtyrat e gjyshit, së bashku me ato të nënës, të babait dhe të gjyshes notojnë mbi sipërfaqen e ujit. Gjyshja hap derën e banjës dhe hedh vështrimin mbi vaskë. Nuk e dallon dot fare gjyshin. Uji këllirë i vaskës llokoçitet mbi bordurën e saj. Gjyshi duhet të jetë brenda në vaskë, mendon ajo. Gjyshja mbyll derën e banjës dhe largohet. Gjyshi ngrihet nga vaska dhe lë ujin e saj të kullojë. Lëtyrat e nënës, babait, gjyshes dhe gjyshit vërtiten rreth tubit të shkarkimit. E sapolarë, familja shvabe ulet përpara ekranit. E freskët, familja shvabe pret të shohë filmin e së shtunës mbrëma…
Përktheu Anna Kove
filologus.al 
Leave a comment